४ सय ७५ कर्मचारी कारबाहीमा

मुलुकको प्रमुख प्रशासनिक निकाय सिंहदरबारभित्रै रहेका कर्मचारीहरू अटेरी रहेको पाइएको छ । सिंहदरबारमा कार्यरतमध्ये निर्धारित पोसाक नलगाई आएका ४ सय ७५ जना कर्मचारी कारबाहीमा परेका छन् ।

बुधबार राष्ट्रिय सतर्कता केन्द्रले सिंहदरबार प्रवेश गर्ने तीनवटा गेटमा एकैपटक छड्के अनुगमन र निरीक्षण गर्दा ४ सय ७५ जना कर्मचारी सरकारले तोकेको पोसाक नलगाई आएको पाइएको थियो । सतर्कता केन्द्रका प्रवक्ता ज्ञानराज सुवेदीले ड्रेस कोडको उल्लंघन गर्ने ४ सय ७५ जना कर्मचारीलाई कारबाही गरिएको जानकारी दिए । यसरी कारबाहीमा पर्नेहरूमा कार्यालय सहयोगीदेखि सहसचिवसम्मका कर्मचारी रहेका छन् ।

सतर्कता केन्द्रले चालु आर्थिक वर्षमा पहिलोपटक गरेको अनुगमनका क्रममा निर्धारित पोसाक नलगाई आउने कर्मचारीलाई सचेत पारिएको जानकारी दिएको छ । दोस्रो चरणमा हुने अनुगमनमा पनि निर्धारित पोसाकबिना नै कर्मचारी आएको पाइएमा निजामती सेवा ऐन र नियमावलीमा उल्लेख भएको नियमअनुसार कारबाही गरिने केन्द्रले जनाएको छ ।
केन्द्रले सिंहदरबार प्रवेश गर्ने कर्मचारीले तोकिएको पोसाक नलगाएको भन्दै चेकजाँच गरेको थियो । केन्द्रले बुधबार सिंहदरबारको पूर्वी ढोकामा कर्मचारीहरुले पोसाक लगाए नलगाएको सम्बन्धमा चेकजाँच गरेको थियो । सतर्कता केन्द्रका प्रहरी नायब उपरीक्षक अधिकारीका अनुसार बिहान ९ बजेदेखि नै चेकजाँच गरिनेछ ।

बुधबार सिंहदरबारभित्र काम गर्ने कर्मचारी र बाहिरबाट काम लिएर आउने कर्मचारी सबैले पोसाक लगाए नलगाएको जाँच गरिएको थियो । जाँचका क्रममा अधिकांश कर्मचारीले पोसाक नलगाएको पाइएको थियो । पोसाक नलगाउने कर्मचारीलाई सचेत गराई प्रवेश गर्न दिइएको पनि डीएसपी अधिकारीले बताए । अबदेखि नियमितरुपमा छड्के जाँच गरिने पनि केन्द्रले जनाएको छ ।

LEAVE A REPLY

Please enter your comment!
Please enter your name here