ओलीको प्रस्तावः अब वामदेव गौतमलाई प्रधानमन्त्री बनाऔँ

सत्तारुढ नेपाल कम्युनिस्ट पार्टी (नेकपा)मा पछिल्ला केही महिना यता जब विवाद बढ्दै जान्छ, नेकपा अध्यक्ष तथा प्रधानमन्त्री केपी शर्मा ओलीको राजीनामा माग हुन थाल्छ । उनले कम्तिमा पनि एक पदबाट राजीनामा दिनु पर्ने माग उनकै पार्टीका नेताहरुले उठाउने गरेका छन् ।

बुधबार बालुवाटारमा बसेको स्थायी कमिटी बैठकमा प्रधानमन्त्री ओलीले पहिलो तहका चार जना नेता प्रधानमन्त्री भइसकेकाले अब वामदेवको पालो भएको बताएका हुन् । पहिलो तहमा प्रधानमन्त्री अ‍ोली, पार्टी अध्यक्ष पुष्पकमल दाहाल प्रचण्ड, वरिष्ठ नेताहरु झलनाथ खनाल र माधव कुमार नेपाल रहेका छन् ।

‘म त्याग गर्न तयार छु, भनेकै छु । मलाई अध्यक्ष र प्रधानमन्त्री पदमा टाँसिइरहन लोभ पनि छैन । मैले छाड्छु,’ स्थायी कमिटीका एक सदस्यका अनुसार ओलीको भनाइ थियो, ‘मेरा लागि पद महत्वपूर्ण छैन । तर, त्यसपछि को हुने हो ? हामीमध्ये धेरै प्रधानमन्त्री भइसकेका छौँ । अब नभएकालाई दिऊँ न त । यही साइडमा उपाध्यक्ष वामदेव कमरेड हुनुहुन्छ । चुनाव गरेर हुन्छ कि कसरी हुन्छ, उहाँलाई बनाउँदा पनि भयो ।’ तर, उनले आफ्नो प्रस्तावबारे थप प्रस्ट भने पारेनन् ।